Bmw Club Wien

Obervellach (8 Tage)
von Gerhard Ochsenbauer und Peter
Eine Woche auf zwei Rädern/Obervellach   
               
Ein kärntnerischer Bericht

Am Somstog sein ma mir aufgebroochn und a scheene Streeckn iba Mariazell und Triebener Tauern noch Obervellach im Mölltol gefohrn. Beestns organisiert vom Geerhard und Famiilie homma ma mir die Quartiere bezogn, Untalogn bekomman, die Woochn besproochn und mit oltbekontn Bikern aus vaschiiedanen Leendern Fraindschoftn erneiert.

Dos Wormlaafn am Sonntog hot uns aufs Nossfeld und aufn Plöcknposs gefiaht. Da Sepp hot mehr Reifendruck gebraucht wegen der großen Datenmengen, die er auf sein GPS gespielt hot – er wollt net jeden Tog ins folsche Obavellach bei Hermagor fohrn und vergeblich noch der Pension Pacher frogn, wie am Somstog.

Montog hom Friaul und da Troglav-Natuapark gezaagt, doss a die Windischn a gonze Menge iba hom fia die Natua und a scheene Gegend hom, fost wia mia in Käantn. Ollerdings sein nur a poor Holländer und Daitsche die Streeckn gefohrn. Die ibaschlauen Eesterreicher hom Ongst vorm Schleechtweetter gehobt und seind erst reecht in an Wolkenbruch auf der Nockolm gekomman, gell Geerhard!

Die Noockolm–Kliippitztörl–Sauolm–Fohrt am Dienstog hot donn gezaagt, wo da käantna Bartl in Most oba holt! Do hom se oba geschwiitzt, unsare Freeinde ausn Flochlond, wia da Geerhard vuraaus auf die Heeh gewedlt is wia a Geemsn am Föölsn. Geloocht hot a nua, wia die Bersch1) und die Gitschn2) getscheentscht3) hom vua lauta Ongst vua die Kurvalan4)! Ob Wolfsberg is leider lei noss gewesn. Ober gonz Käarntn hot vom Sepp, dem Teifi auf der Sterischen Harmonika gesproochn, wie er mit seine Stickalan für Stimmung gesorgt hot!

Am Miittwoch, am Ruhetog, homma ma mia nix geruuht. Dos Weetter is gor nit so schleecht geweesn, anige sein am Großglockner gefohrn und hom nochher beim Himmelbauern den Blick ins Mölltol genoosn.

Südtirol ondas rum is gor nimma auhfgefolln am Donnerstog, so schwindlig sein olle noch geweesn. Die gonzn Peesse und Sottln iba und duach die Beerge, vom Stallersottel ibas Würzjoch, Valparola und Falzarego, Tre Croci und wos was i noch, hom uns noch amol richtig vua Augn gefiiat, wos ma den Rest vom Johr wieda vamiissn wean und wos ma ma mir noch olles onschaun solltat. Wia hot unser Stuttgarter Roland richtig gesogt? 20 oder 30 Jahre später geboren worden zu sein hätt´ a gelongt.

Freitiog sein ma mir einige wenige vom Mölltol auf die Pustertoler Höhenstroßn und donn ibas Lechtol, Hermagor und Weißensee wieder retour. Da Geerhard mit seiner Gruppn onders herum – sei eigene Route hot ihm nimma geffolln. Der kulinarische Höhepunkt zum Obschluss: Mit´n Nationalparkzug – a Traktor mit Waggon – sein ma mir zum Haubnlokal „Zur Guten Quelle“ gefohrn. Maaria! Do is ober gegeesn und getrunkn wordn! So guat und so vüül, doss die Quelle fost versiegt wär!

Vom Weetter her geseehn homma ma mia nit gor so a Glick gehobt. A poor Mol hot es riichtig geschittet, oba die Sunn und die Londschoft hom olles wieda ins Positive gebrocht. Die Touren woan vom Geerhard super ausgesuacht, die Stimmung wor guat in der gemiischtn Gruppn zwischen 22 und 73 Johrn, olle Holländer und Daitschn und Eestreicher hom vül gelocht, glockenhell die Marion und da Stefan, und da Obmonn wor a kommoota Lootta5). Da Bürgermeister, im Zivilberuf Veterinärmediziner, olso a Viiecherdookta, tat sich gfrein, wonn er uns nächstes Johr wieder sehn tat. Net ols Patienten. Ols Geeste!

1)	Bersch: Burschen, Männer
2)	Gitschn: Mädchen, Frauen
3)	Getscheenscht; tscheentschn: jammern, wehklagen, weinen
4)	Kurvalan: kleine Kurven
5)	Kommoota Loota: prima Kerl, klasser Bursch


 Gerhard Ochsenbauer und Peter Gusmits
voriges Bild | nächstes Bild
Medieninhaber: BMW Club Wien | Bankverbindung: Bank Austria Creditanstalt / BLZ: 12000 / Kto.Nr.: 51506033584 | Gestaltung: future design